Kun pamatyagan mo nga ulihi na ang tanan para sa imo, paminsara mayad ang tumalagsaon nga scenario sa Australia kun sa diin ginpamatud-an nga indi pa ulihi ang tanan.
Bangud ginkilala sang Guinness World Records ang isa ka 91-anyos nga Australian bilang pinakatigulang nga first-time grandfather ukon lolo sa kalibutan.
Ang tigulang amo si Charles Smith, 91-anyos sang ginbun-ag ang iya apo nga si Isla, bata sang iya anak nga si Ashley.
Talalupangdon nga 55 ka tuig ang iya edad sang ginbata si Ashley, gani sa ulihi na nga bahin sang iya kabuhi ang mangin lolo.
Ginpahayag ni Smith nga madasig nga naglapit ang iya balatyagon sang iya apo kag suno sa iya, indi niya luyag nga buy-an ini, magluwas na lang kun tion na sang pag-ilis sang lampin.
Samtang, nagpahayag naman si Ashley Smith nga makatingala ang iya amay indi lamang bilang record-holder kundi bilang inspirasyon man sa ila pamilya nga ginhimo ang tanan nga paagi agud ihatag ang maayo nga kabuhi para sa ila, ilabi na para sa iya kabataan.
