ROXAS CITY – (UPDATE) Nagapati ang himata sang 92-anyos nga lola nga wala sang foul play sa kamatayon sini.
Sa interview sang Bombo Radyo kay Hermenia Ferrer, 63-anyos, kag nagapuyo na sa karon sa Brgy. Sta. Cruz, Dumalag, Capiz, suno diri, wala sang may luyag nga sa pagkasunog nga pamaagi madula ang ila Iloy, bangud sa edad sini nga 92, mabakod pa ini, kag masarangan nga magluto para sa iya kaugalingon.
Apang, wala ini ginapabay-an sang iya mga kabataan kag apo nga yara man sa iya palibot, bangud gina ilusan ini sang pagkaon sang tigulang.
Luyag gid lamang sang ila Iloy nga magpangabuhi sang malinong kag mag-isahanon sa iya payag.
Posible man suno diri nga napabay-an nga niluto sa iya dapog ang ginhalinan sang kalayo, bangud nagaluto ini sang pagkaon kun luyag sang ila Iloy.
Matandaan nga alas-3 sang hapon kahapon nga adlaw, Mayo 29, sang madasig nga gintupok sang kalayo ang payag sang biktima nga ginkilala kay Cecilia Zaldivar, residente sang Brgy. Balaring, banwa sang Ivisan.
Gintinguhaan pa ini nga masalbar sang mga kasilingan apang bangud sa human sa light materials ang puloy-an sang tigulang, madasig ini nga naabot sang kalayo.
Sa karon, natalana nga igahamyang bangkay sang ila Iloy sa nasambit nga lugar.
