ROXAS CITY – Natigayon nga makasal ang 95 ka pares sa banwa sang Pontevedra kadungan sa adlaw sang mga taguipusuon.
Sa interview sang Bombo Radyo Roxas kay Engr. Franky Dordas, Provincial Statistics Officer, ginpahayag sini nga ang mass civil wedding ukon ang “Kasalang-Bayan” ang isa ka tuigan nga aktibidad sang nasambit nga banwa kun sa diin tinutuyo sini nga mabuligan ang mga magkahagugma nga makasal kag mangin legal ang pag-upod kag ini ang ginasuportahan gid lamang sa Philippine Statistics Authority (PSA).
Suno kay Dordas, ang pagpatigayon sang mass civil wedding ang kasunod sa pagselebrar sang Civil Registration Month kada bulan sang Pebrero.
Nahibaluan nga ang nagkasal sa 95 ka pares amo si Vice Mayor Ferne Oquendo nga amo sa karun ang acting mayor bangud naka-leave ang alkalde sang nasambit nga banwa nga si Estevan Evan ‘Dodoy’ Contreras.
Dugang pa sini nga ang nagpatigayon gid sang nasambit nga programa amo ang Municipal Civil Registrar nga si Grace Mayo.
Ginpahayag man sini nga apisar madamo sang tawo ang nagtambong sa nasambit nga kahiwatan, nasunod man sa gihapon sini ang mga ginapatuman nga protocols.
