Nangin madinalag-on ang ginpatigayon sang Atin Ito group nga jetski flag ride sa Pag-asa Island bilang kabahin sang ila ikaapat nga Civilian Mission sa West Philippine Sea.
Ang nasambit nga aktibidad ang ginpangunahan ni Akbayan Party-list Rep. Dadah Kiram Ismula kag ginhatagan pagtamod nga isa ini ka malinong nga pamaagi sa pagtindog para sa pungsod.
Suno kay Ismula, katuyuan sang amo nga aktibidad amo ang pagpakita sang padayon nga pagdepensa sang Pilipinas sa soberanya kag integridad sa teritoryo sa tunga sang presensya sang China sa lugar.
Kadungan sini, madinalag-on man nga nakalab-ot ang grupo sa Pag-asa Cay 2 kon sa diin ginpasaka ang bandera sang Pilipinas sa pihak sang hugot nga pagbantay sa mga barko sang China.
Ang misyon ni Atin Ito magapadayon tubtob buwas nga adlaw nga ginakalakipan sang supply delivery, medical outreach, kag iban pa nga humanitarian activities sa West Philippine Sea.
