Nagapanawagan sa publiko ang pila ka mga street sweeper sa Roxas City nga mangin responsable sa pagdumala sang ila mga basura agud mapabilin nga matinlo kag mahapos limpyohan ang mga karsada kag palibot.
Sa interview sang Bombo Radyo kay Rina Riban, isa ka street sweeper, iya ginpahayag nga daku nga bulig sa ila trabaho kon ang mga residente mismo magahimo sang husto nga paghimos sang basura kag indi ini pagbilin-bilin sa mga dalan.
Ginahingyo man nila ang publiko nga gamiton ang mga designated nga basurahan sa paghaboy sang basura.
Pahayag pa niya, gamiton ang sako sa pagputos sang basura imbes nga garbage bag nga madasig magisi ukon maguba, ilabi na kon ginkutkot sang mga ido.
Dugang pa sang natungdan, importante ang kooperasyon sang tanan agud mapadayon ang katinlo sang Roxas City.
