Gin-aprubahan sang Kamara ang isa ka hagna nga nagapalawig sang termino sang opisina sang mga barangay kag Sangguniang Kabataan (SK) officials halin sa apat tubtub lima ka tuig.
Sa boto nga 211 pabor, 13 ang indi pabor, kag isa ka abstention, gin-aprubahan sang mga mamalidha ang House Bill 10971 sa ikatlo kag katapusan nga pagbasa.
Sa idalom sang proposal, ang masunod nga Barangay and SK Elections (BSKE) ang iga-postpone kag i-reschedule sa 2028 sa baylo nga subong nga tuig.
Nagpamatuk naman SI House Assistant Minority Leader Renee Co sang Kabataan Party-list sa amo nga tikang.
Suno kay Co, maathag ini nga halimbawa sang pagpadayon sang patronage sa pulitika.
Samtang, kinahanglan pa nga binagbinagon kag desisyunan sang Senado ang amo nga tikang antes ini mahimo nga layi.
