Nasapwan nga wala na sang kabuhi ang isa ka wala pa makilala nga lalaki sa sulod sang drainage canal sa Barangay Bolo, Roxas City.
Ang biktima nagasuksok sang itom nga bayo kag itom man nga shorts kag ginabanta nga yara sa edad 40 anyos.
Sa interview sang Bombo Radyo kay Police Lieutenant Colonel Rogelio Tomagtang Jr., Chief of Police sang Roxas Component City Police Station, iya ginpahayag nga base sa impormasyon nga nakuha sang kapulisan, nakita pa nga nagalakat ang biktima antes ini nasapwan patay sa sulod sang drainage canal sa lugar.
Suno kay Tomagtang, ginapahayag nga posible nga yara sa impluwensya sang makahulubog nga ilimnon ang biktima sang natabo ang insidente.
Na-recover man sa lugar ang isa ka cellphone nga ginapanag-iyahan sang biktima.
Padayon naman ang imbestigasyon sang kapulisan sa amo nga insidente.
Samtang, nagapawagan man ang natungdan sa mga himata ukon nakakilala sa biktima nga magpakig-angot sa Roxas Component City Police Station.
