Naghiwat sang pagsinapol ang Provincial Health Board sang Capiz sang Setyembre 18, 2026 sa Hall of Governors agud talakayon ang nagkalain-lain nga programa kag serbisyo sa ikaayong lawas para sa kaayuhan sang mga pumuluyo sa probinsya.
Isa sa mga gin-aprobahan sa pagsinapol amu ang pagdihon sang Draft Sangguniang Panlalawigan Resolution nga magahatag otoridad kay Governor Fredenil H. Castro nga makapirma sang Memorandum of Agreement (MOA) upod sa Department of Health (DOH) para sa Tuberculosis Grants.
Gin-isturyahan man ang pagpakig-angut sang Capiz Wellness Center kag Ardivilla Optical Clinic para sa paghatag sang PhilHealth Optometry Package kag dugang nga serbisyo para sa ikaayo sang panan-awan sang mga Capiznon.
Samtang, ginmonitor man sang board ang sitwasyon kag mga kaso sang Hand, Foot, and Mouth Disease (HFMD) kag Chikungunya sa probinsya. Kabahin ini sang padayon nga pagpatuman sang mga tikang sa pagpugong kag pagkontrol sang paglapta sang mga balatian sa komunidad.
Ginpasalamatan ni Dr. Alex Nolasco ang presensya kag pagpanguna ni Governor Fredenil H. Castro sa nasambit nga pagsinapol, nga gintambungan sang mga representante sang local government, nagkalain-lain nga ahensya sang gobyerno, health workers, partners kag stakeholders.
Pinaagi sa amu nga pagtililipon, ginpabaskog sang Provincial Health Board ang koordinasyon sang nagkalain-lain nga sektor sa pagpalapad kag pagpaayo sang mga serbisyo sa ikaayong lawas para sa tagsa ka Capiznon sa bug-os nga probinsya.
