Kritikal ang kondisyon sang isa sa mga estudyante nga napilasan sa pagpangluthang sa Banga National High School sa South Cotabato kag yara na sa intensive care unit ukon ICU sang isa ka ospital.
Suno kay Banga MDRRMO head Joseph Franco, gilayon nga gindala sa Cotabato Regional and Medical Center sa Cotabato City ang estudyante para sa dugang nga obserbasyon kag pagbulong.
Tatlo ka pilason ang nakagwa na sa ospital kag nakapauli na sa ila mga puluy-an, samtang tatlo naman ang ginsaylo sa duha ka pribado nga ospital sa syudad sang Koronadal.
Suno kay Franco, pito ang pilason kag tatlo ang patay lakip na ang suspek sa pagpangluthang nga lunsay mga Grade 9 students ang involved sa insidente.
Samtang, ginpahayag ni Franco nga masobra 3,000 ang populasyon sang Banga National High School apang isa lang ka security guard ang na-assign sa main gate.
Padayon naman ang pag-verify sang kapulisan sa motibo kag iban pa nga detalye may kaangtanan sa insidente.
Suspendido ang klase sa pampubliko nga buluthuan sa Banga sa Setyembre 21 agud maghiwat sang pagsinapol ang mga school officials, PNP kag iban pa nga natungdan nga ahensya agud istoryahan ang insidente kag mga tikang agud indi na ini masulit.
Nagmando naman si President Ferdinand Marcos Jr. sang maid-id nga imbestigasyon sa natabo nga pagpangluthang kag ginpasalig ang bulig sang gobyerno sa mga biktima kag ila pamilya.
