Napirmahan na ni Department of Finance (DOF) Secretary Frederick Go ang isa ka resolution para sa suspension sang excise tax sa liquefied petroleum gas (LPG) kag kerosene.
Ginpahayag ini ni Go sa Senate budget hearing sang Department of Finance (DOF), matapos liwat nga nagpanawagan si Senator Bong Go nga suspendihon ang fuel excise taxes bangud sa nagapadayon nga conflict sa Middle East.
Apang ginpahayag sang DOF chief nga indi sila pabor nga suspendihon ang excise taxes sa diesel kag gasolina.
Suno kay Go, ang amo nga tikang mangin “not progressive” kag mahimo magresulta sa revenue loss nga ginabulubanta sa P12 billion kada bulan.
Sa baylo, padayon nga magahatag ang gobyerno sang targeted subsidies agud mabuligan ang mga consumer nga nagaatubang sang nagasaka nga presyo sang gating.
Sang nagligad nga semana, ginpahayag ni Go nga nagahulat siya sang confirmation halin sa Department of Energy nga ang presyo sang Dubai crude oil naglapaw na sa $80 kada barrel base sa one-month average.
Amo ini ang threshold nga kinahanglan malab-ot antes maka-propose sang suspension sang fuel excise taxes.
Sa idalom sang Republic Act 10963, ukon ang Tax Reform for Acceleration and Inclusion (TRAIN) Law, gintukod ang excise tax nga P3.00 kada kilo para sa LPG kag P5.00 kada litro para sa kerosene.
Samtang, ginpirmahan ni President Ferdinand “Bongbong” Marcos Jr. ang Republic Act 12316 bilang layi sang Marso, nga nagahatag sa iya sang emergency powers para suspendihon ukon pagnuboan ang excise tax rate sa gatong.
Sa idalom sang sini nga measure, mahimo ipatuman ang suspension ukon reduction sang excise tax tubtob sa tatlo ka bulan kon ang average price sang Dubai crude oil—base sa Mean of Platts Singapore (MOPS)—mag-abot ukon maglapaw sa $80 kada barrel sulod sang isa ka bulan.
Samtang, ang presyo sang Brent crude oil nagalibot sa $102 kada barrel.
Sang Abril subong nga tuig, ginhimo na ni President Marcos ang suspension sang excise tax sa LPG kag kerosene bangud sa mataas nga presyo sang fuel sa pungsod.
Buot silingon, P3.36 kada kilo ang napanubo sa presyo sang LPG, ukon halos P37 kada tangke, samtang P5.65 kada litro ang napanubo sa presyo sang kerosene.
Apang sang Hulyo 2026, gin-untat ang suspension sang pagkolekta sang excise tax sa LPG kag kerosene.
Natabo ini matapos magnubo sa idalom sang $80 kada barrel ang average price sang Dubai crude oil sang Hunyo.
Ini ang threshold nga ginapatuman sa idalom sang Executive Order No. 114-2026, nga nagrekomenda sang full suspension sang excise tax sa LPG kag kerosene.
