Naglab-ot sa halos P1.5 million nga balor sang illegal nga droga ang nakuha sa duha ka mga arestado sa ginpatigayon nga drug buy-bust operation sa Barangay Cogon,Roxas City.
Ang mga arestado amo sanday alyas “Madame L,” 28-anyos, residente sang Barangay San Roque Street, Dumalag, Capiz, apang temporaryo nga nagatinir sa syudad sang Roxas kag alyas “Lezil,” 50-anyos, kag residente sang Barangay Dumulog, Roxas City.
Sa interview sang Bombo Radyo kay Police Captain Dennis Losbañes, Team leader sang Regional Drug Enforcement Unit-6, iya ginpahayag nga nakuha sa paghinakop sang mga arestado ang 13 ka sachets sang suspected shabu nga may kabug-aton nga 220 grams ka may standard drug price nga P1,496,000.
Suno kay Losbañes, naglab-ot sa tatlo ka semana ang monitoring sa mga subject antis natigayon ang madinalag-on nga operasyon.
Sa subong, preso na ang mga ini sa Roxas City Police Station kag nagapangatubang sa kaso nga napasakaan na sang kaso nga paglapas sang Republic Act 9165 ukon Comprehensive Dangerous Drugs Act of 2002.
