Posible nga indi na pag-ipresentar sang House prosecution panel ang ebidensya para sa bribery charge batok kay Vice President Sara Duterte kung kulang ang oras sa impeachment trial.
Suno kay prosecution spokesperson Atty. Benjamin Tolosa Jr., target nila nga matapos ang pagpresentar sang ebidensya sa tunga sang Oktubre antes magpokus ang Senado sa pagtalakay sang ₱7.2-trilyon nga 2027 national budget.
Ginatan-aw man sang prosecution kon kinahanglan pa ipresentar ang tanan nga financial records parte sa alegasyon sang unexplained wealth bangod kadamo sang mga dokumento.
Upod sa impeachment case ang alegasyon sang sala nga paggamit sang confidential funds, unexplained wealth, bribery, kag pagpamahog sa pila ka opisyal sang gobyerno.
Posible nga ipadayon ang impeachment trial sa katapusan nga bahin sang Nobyembre pagkatapos sang budget deliberations.
