MANILA-Ginakabig ni anay presidential legal counsel Salvador Panelo nga “fabricated story” ukon himo-himo ang alegasyon sang anay police officer nga nagtuhoy ini sang maleta nga may sulod nga kwarta sa pamilya Duterte.
Ang anay police corporal nga si Rodulfo Gracioso Jr., nga nagsiling nga nagserbe bilang security aide ni anay House Speaker Lord Allan Velasco, nag-angkon siya sang kapin P2 bilyon kay Vice President Sara Duterte sa sobra 20 ka okasyon. Gin-akusahan man niya nga may mga cash delivery para kay anay Presidente Rodrigo Duterte kag Davao City First District Representative Paolo Duterte, suno sa iya, sa mando ni Velasco.
Apang ginpanginwala ni Panelo ang alegasyon kag ginakabig ini nga bahin sang ginatawag niya nga black propaganda batok sa Bise Presidente. Ginreject man sang kampo ni Velasco ang alegasyon kag nagsiling nga wala ini sang basihan kag indi nagasanto sa mga beripikado nga hitabo.
Samantala, ginpanginwala man ni Vice President Sara Duterte nga nakabaton siya sang kwarta halin kay Gracioso kag nagsiling nga wala niya ini makilala. Ginpahayag niya nga nagahulat ang iya mga abogado sang opisyal nga kopya sang affidavit ni Gracioso antes magdesisyon sa legal nga tikang.
Samtang, ginapa-imbestigar sang National Bureau of Investigation ang alegasyon ni Gracioso. Suno sa NBI, ginpaagi man nila si Gracioso sa polygraph examination kag may pila ka bahin sang iya mga pahayag nga gin-validate paagi sa iban nga pamaagi.
Ang alegasyon nagluntad samtang ginatalakay sa Senate impeachment court ang mga akusasyon batok sa Bise Presidente, lakip ang alegasyon sang unexplained wealth. Apang ang mga cash-delivery claim ni Gracioso wala pa napamatud-an bilang kamatuoran kag padayon pa ini nga ginaimbestigahan.
