CHINA- Ginkastigo sang Chinese Embassy si Defense Secretary Gilberto Teodoro Jr. bangod sa iya mga pahayag parte sa West Philippine Sea kag sa mga ilegal nga aktibidad nga ginalambigit sa pila ka Chinese nationals sa Pilipinas.
Sa statement sang Chinese Embassy sang Domingo, ginakabig sini si Teodoro nga “extremely anti-China” kag ginakusahan sang pagdistort sang facts kag pagpalala sang tensyon sa relasyon sang Pilipinas kag China. Suno sa embahada, ang iya mga pahayag nagatinguha nga makakuha sang political capital kag personal nga benepisyo.
Ini matapos nga ginpahayag ni Teodoro sa isa ka forum nga ginapa-imbestigahan sang gobyerno ang ginatawag niya nga “nefarious” ukon malain nga foreign activities sa Pilipinas. Lakip sa iya ginhisgutan ang kaso ni anay Bamban Mayor Alice Guo kag ang pagdamo sang mga steel plant nga ginasuspetsahan nga nagaproduce sang substandard nga steel products.
Ginpahayag man ni Teodoro nga padayon nga ginapilit sang China ang iya pressure batok sa interes sang Pilipinas kag nagpaandam batok sa posibilidad sang isa ka “Sinocentric” nga kalibutan. Apang ginpahayag niya nga indi niya luyag nga magtuga sang pagdumot batok sa mga Chinese nationals kag ang iya concern amo ang mga aksyon nga mahimo makaapekto sa seguridad kag interes sang Pilipinas.
Sa pihak nga bahin, ginpahayag sang Chinese Embassy nga ang mga pahayag ni Teodoro mahimo magpalala sang confrontation kag magtuga sang pagkabahinbahin sa tunga sang mga Pilipino kag Chinese. Ginkontra man sini ang iya mga alegasyon kag ginpahayag nga ang amo nga mga paninguha “doomed to fail.”
Samtang, nagapadayon ang pagbinaylohay sang mabaskog nga pahayag sa tunga sang Manila kag Beijing samtang nagapabilin ang tensyon sa West Philippine Sea kag nagadamo ang mga isyu parte sa Chinese activities sa Pilipinas.
