MANILA-Ginalauman nga magtestigo sa Senado si Davao City Mayor Sebastian “Baste” Duterte sa pagpadayon sang impeachment trial ni Vice President Sara Duterte sini nga Martes, Setyembre 29. Sentro sang pagpamangkot ang alegasyon sang unexplained wealth kag business interests sang Bise Presidente, lakip ang mga transaksyon nga may kaangtanan sa GenCorp Industries Incorporated.
Ginalauman nga pamatuoran ni Baste ang mga dokumento kag transaksyon sang Davao City government sa GenCorp, suno sa subpoena nga ginpagwa sang impeachment court. Base sa testimonya ni PhilGEPS Division Chief Rendell Sopeña, nakahatag ang Davao City government sang 15 ka kontrata sa GenCorp nga nagabalor sang kapin 34.2 milyon pesos.
Antes sini, ginpahayag ni Baste nga 19 ka kontrata ang nakuha sang GenCorp gikan sa Davao City government nga nagabalor sang 33.26 milyon pesos, diin 13 ang tapos na kag anum ang padayon pa. Suno sa alkalde, wala siya kag iban pa nga city officials nakahibalo nga may gin-deklarar nga interes si Vice President Duterte sa GenCorp.
Sa impeachment trial, ginatukiban man ang ginatawag nga GenCorp-SALN discrepancy. Gin-deklarar ni Vice President Duterte ang GenCorp bilang business interest sa iya 2024 kag 2025 Statements of Assets, Liabilities and Net Worth ukon SALNs, apang suno sa Securities and Exchange Commission records nga ginpresentar sa trial, wala makita ang iya ngalan bilang stockholder, incorporator ukon director sang kompanya.
Samtang, ginpahayag sang prosecution nga nakakuha ang GenCorp sang 49 ka government contracts nga nagabalor sang 35.88 milyon pesos gikan sa Davao City government, PhilHealth Region XI kag OWWA Region XI sa tion nga Vice President na si Duterte. Ginalakip ini sang prosecution sa alegasyon nga wala siya nakahimo sang divestment ukon pagbiya sa iya business interests samtang yara sa pwesto, samtang ginakwestyon naman sang depensa ang relevance sang mga transaksyon.
