Ginabalanse sang gobyerno ang pagresponde sa kinahanglanon sang mga transport worker kag commuters kasunod sang gin-aprobahan nga pagtaas sang plete bangud sa padayon nga pagsaka sang presyo sang langis sa world market.
Suno kay Presidential Communications Office Undersecretary kag Palace Press Officer Claire Castro sa press briefing sa Malacañang, kinahanglan ang fare increase agud mabuligan ang mga operator kag driver sang jeepney sa nagataas nga gasto sa gasolina, samtang ginakonsiderar man ang kaayuhan sang mga pasahero.
Ginpahayag ni Castro nga padayon ang bulig sang gobyerno sa mga apektado nga transport worker, lakip na ang fuel subsidy.
Sa idalom sang bag-o nga fare increase, 14 pesos na ang minimum fare sa traditional jeepney halin sa 13 pesos, samtang 17 pesos naman sa modern jeepney halin sa 15 pesos.
May dugang man nga plete sa mga bus, UV Express, taxi, TNVS kag point-to-point buses.
Ginpasiguro naman ni Castro nga magapadayon ang mga discount sa plete para sa mga estudyante, senior citizens kag persons with disabilities ukon PWDs.
Suno sa opisyal sang Palasyo, padayon nga ginatun-an sang gobyerno ang mga tikang agud maminusan ang epekto sang mataas nga presyo sang langis kag plete sa mga commuter.
Samtang, ginatahod sang gobyerno ang kinamatarong sang mga pumuluyo nga magpatigayon sang malinong nga protesta kag nanawagan sa mga nagaprotesta nga siguruhon nga mangin maayo kag malinong ang ila mga aktibidad.
