Nakabatyag sang kahadlok kag kakulba ang pila ka mga Pinoy sa Nepal kasunod sang asud-asud nga pag-ulan kag mga insidente sang landslides sa pila ka bahin sang pungsod.
Suno kay Bombo Trini Laurea Basnet, International Correspondent sa Nepal, iya ginpahayag nga nagapabilin nga alerto ang mga Pinoy bangud sa wala untat nga pag-ulan kag pamahog sang landslide kag pagbaha sa pila ka mga lugar.
Ginpahayag sini nga 4 ka tawo ang napatay kag 12 ang nagapabilin nga missing sa base camp kun sa diin natabo ang landslide.
Samtang, padayon naman ang monitoring sang gobyerno sang Pilipinas sa sitwasyon sang mga Pinoy sa Nepal, ilabi na sa mga lugar nga apektado sang mabaskog nga ulan, baha kag landslides.
Suno sa mga otoridad, ginapanugyanan ang mga residente kag mga dumuluong sa apektado nga lugar nga magpabilin nga mabinantayon kag magsunod sa mga abiso sang lokal nga gobyerno agud malikawan ang dugang nga katalagman.
