Nagapati ang isa ka abogado nga ginrespeto sang Supreme Court ang procedural aspect sang impeachment trial kasunod sang pagbasura sa petisyon nga nagakwestyon sa gin-adjust nga voting threshold.
Sa interview sang Bombo Radyo kay Atty. Rodel Taton, Dean sang Graduate School of Law sang San Sebastian College–Recoletos sa Manila, iya ginpahayag nga procedural grounds ang ginhatagan sang atensyon sang Supreme Court, partikular na ang legal standing kag prematurity sang petisyon.
Suno kay Taton, wala nagadesisyon ang Supreme Court sa political nga aspeto sang impeachment sa baylo,ang ginsolusyon sang korte amo ang mga isyu nga may kaangtanan sa proseso kag kon may yara bala sang legal nga basehan ang gin-file nga petisyon.
Dugang pa sini, may mga butang nga yara sa hurisdiksyon sang Supreme Court, samtang may mga desisyon naman nga kabahin sang proseso sang impeachment.
Matandaan nga sang Septyembre 23, sa boto nga 13 nga pabor kag 1 nga nagpamatok, nadesisyunan sang Senate Impeachment Court nga bag-uhon ang voting threshold kasunod sang appeal ni Senator-Judge Erwin Tulfo sang September 8.
