Patay ang isa ka 19-anyos lalaki, matapos nga ginbuno sang isa ka ginaalegar miyembro sang Citizen Armed Force
Geographical Units (CAFGU), sa gwa sang binaylihan, sa Poblacion, Tapaz, Capiz.
Ang biktima amo si alyas “James”, 19-anyos kag residente sang Brgy. Tabon, Tapaz, Capiz, samtang ang suspek amo si alyas “Rex”, 20-anyos kag residente sang Brgy. San Francisco, Tapaz, Capiz.
Sandig sa impormasyon nga nakuha sang Bombo Radyo sa Tapaz Municipal Police Station, ginapahayag nga may yara sang natabo nga komosyon sa magtimbang nga grupo sang suspek kag biktima, sa gwa sang binaylihan kadungan sang kapistahan sa Banwa kun sa diin hinali nalang nga ginbuno sang suspek ang biktima gamit ang kutsilyo, kag baigo ini sa likod nga portion sang iya nga tiyan.
Madasig naman nga ginpadangat sang Tapaz MDRRMO sa Tapaz District Hospital para madapatan sang nagakaigo nga pagbulong apang ginbawian sang kabuhi ang nasambit nga biktima.
Sa subong, padayon ang imbestigasyon sang mga katapo sang kapulisan angut sa natabo nga insidente.
