Pagadal-on subong nga adlaw sa Capiz Provincial Jail para sa nagaigo nga disposisyo ang suspek nga si Leonil Deocampo sa pagluthang-patay kay Police Captain Rian Ampoyos, anay pinuno sang 1st Capiz Mobile Force Company.
Sa interview sang Bombo Radyo kay Police Lieutenant Colonel Francisco Paguia, hepe sang 1st Police Mobile Force Company, iya ginpahayag nga magapangatubang si Deocampo sang kaso nga Murder kag paggamit sang indi lisensiyado nga armas luthang sa idalom sang Republic Act No. 10591 ukon Comprehensive Firearms and Ammunition Regulation Act.
Suno kay Paguia, padayon man ang ila nga pagpangita sa wanted person nga si Juvy Bagares, matapos ini makapalagyo sang ginserbe sang mga pulis ang warrant of arrest batok sa iya.
Dugang pa ni Paguia, posible man nga mapasakaan sang kaso ang tawo nga nagabulig ukon nagatago sa isa ka wanted person, depende sa resulta sang ila imbestigasyon.
Matandaan nga ginluthang Police Captain Ampoyos ang ginluthang-patay sa sulod sang isa ka videoke bar sa Barangay Binuntucan, Pontevedra, Capiz sang Hulyo 20.
