Nagatanyag sang mas mataas nga presyo ang National Food Authority ukon NFA para sa pagbakal sang humay agud ma-engganyo ang mga mangunguma nga ibaligya ang ila patubas diri kag mapasanyog ang rice buffer stock sang pungsod.
Suno kay NFA Administrator Larry Lacson, nagalab-ot lang sa ₱4 tubtub ₱5 kada kilo ang tanyag sang NFA kun ipaanggid sa presyo sang mga negosyante.
Katuyuan sini nga mapun-an liwat ang mga stock bilang preparasyon sa posible nga pagnubo sang produksyon sang humay bangud sa “super” El Niño, nga suno sa Department of Agriculture mahimo nga makapanubo sang tubtob 700,000 metric tons sa produksyon sang humay.
Sa subong, yara sa 75-day supply ang rice buffer stock sang pungsod gani suno kay Lacson yara sa maayo nga posisyon ang NFA sa pihak sang ginapaabot nga epekto sang El Niño.
