Nagapati ang human rights lawyer nga nga wala sang daku nga epekto sa impeachment trial ni Vice President Sara Duterte ang indi na pagpresentar kay Former Senador Antonio “Sonny” Trillanes IV bilang witness sang prosecution.
Sa interview sang Bombo Radyo kay Atty. Jobert Llarde Pahilga, Human Rights Lawyer, iya ginpahayag nga indi na kinahanglan nga magtestigo si Trillanes para mapamatud-an ang mga alegasyon kaangut sa financial transactions ni VP Sara, bangud may yara na sang mga dokumento kag rekord nga mahimo gamiton bilang ebidensya.
Suno kay Pahilga, yara na sa prosecution ang mga rekord sang Anti-Money Laundering Council ukon AMLC, lakip ang mga bank records nga may kaangtanan sa mga financial transactions, kag ang Statement of Assets, Liabilities and Net Worth ukon SALN sang bise presidente.
Samtang, gin-anunsyo sang House prosecution panel sang Oktubre 1 nga indi na nila ipresentar si Trillanes bilang witness sa impeachment trial.
Una na nga nagtestigo sa House Justice Committee ang AMLC Executive Director Ronel Buenaventura, nga nagpatpat parte sa mga rekord kag financial transactions nga may kaangtanan sa kaso.
Suno sa AMLC, may mga financial transactions nga gin-cite ni Trillanes nga nagakatugma sa ini sa rekord sang ahensya.
