Posible nga magdesisyon sa masunod nga semana ang House Prosecution panel kon ipadayon pa nila ang pagpresentar sang alegasyon sang bribery sa impeachment trial batok kay VP Sara Duterte.
Ang alegasyon nagasentro sa ginapahayag nga paghatag ni VP Sara sang suhol sa pila ka opisyal sang Department of Education ukon DepEd sang siya pa ang Secretary sang ahensya.
Suno kay Atty. Lorna Kapunan, isa sa mga abogado sang prosecution, pagatalakayon pa sang panel ang ila final nga desisyon parte sa bribery issue. Ginatun-an man nila kon ano ang posible nga epekto kon indi na nila ini pag-ipadayon.
Sa subong, lapit na matapos sang House panel ang pagpresentar sang ila mga testigo. Pagkatapos sini, magaabot ang formal offer of evidence, ukon opisyal nga pagpresentar sang mga ebidensiya.
Posible ini matabo sa masunod nga semana ukon sa ulihi nga bahin sang Oktubre.
Kampante ang abogado nga ang tatlo ka impeachment article nga ila na napresentar kag ginapresentar pa sa subong amo na ang mga mabug-at nga alegasyon kag may yara sila sang nagakaigo nga ebidensiya agod mapakita ang ginapahayag nga impeachable offenses ni VP Sara Duterte.
