Gin-aprubahan sang Trial Chamber III sang International Criminal Court (ICC) ang pangabay sang Office of the Prosecutor nga opisyal nga isulod sa rekord ang recorded testimony sang key witness nga ginkilala bilang “P-1100” sa idalom sang Rule 68(3).
Sa desisyon nga ginpaguwa sang Oktubre 2, ginbuhinan sang Korte sang isa ka oras halin sa orihinal nga ginpangabay nga duha ka oras ang tion nga gintalana para sa dugang nga pagpangusisa sang Prosecutor.
Ini nga tikang nagatuyo nga mapabilin ang madasig, maayo, kag episyente nga dalagan sang trial.
Gintugutan man sang Korte ang pagbaton sang lima ka report nga ginsulat kag ginsumiter mismo sang testigo bilang kabahin sang iya pahayag.
Apang, ginbasura sang Trial Chamber III ang apat pa ka mga dokumento nga gin-file sang Prosecution bangud wala ini ginpaathag sang nagakaigo ukon gingamit sang testigo sa iya testimonya.
Kadungan sini, ginpaandaman sang Korte ang Prosekusyon nga maghalong kag likawan ang ginatawag nga “wholesale dumping,” ukon sulit-sulit nga pagsulod sang ebidensya sa trial record nga halos wala sang direkta nga kaangtanan sa kaso.
