Posible nga magalab-ot sa masobra 45 degrees Celsius ang sobra nga kainit sa pungsod sa palaabuton nga 2027 bangud sa ginapaabot nga Super El Niño suno sa paandam sang Climate Change Commission (CCC).
Suno kay CCC Commissioner Albert Dela Cruz, ang pag-init sang kalibutan mahimo nga magsobra sa 1.5 tubtob 2 degrees Celsius sa tunga-tunga sang Pebrero kag Abril 2027, nga magatuga sang tuman nga mga hitabo sa panahon kag kakulang sang ulan.
Ang region 1, 2, kag 3 ang una nga maka-eksperyensya sang grabe nga epekto umpisa sa ulihi nga bahin sang tuig antes sa katapusan makaapekto sa halos tanan nga mga probinsya sa pungsod sa Marso kag Abril.
Bangud sa pamahog sa supply sang tubig, pagkaon, energy, kag ikaayong lawas, ginaduso sang CCC ang pagbag-o sa iskedyul sang klase sa mga eskwelahan kag proteksyon para sa mga outdoor workers agud malikawan ang sun exposure halin alas 10 sang aga tubtob alas 3 sang hapon.
Bilang preparasyon, ang Department of Education (DepEd) nagapabaskog sang mga contingency plans, pagka-flexible sa mga iskedyul sang klase, kag pagtudlo sang climate change concepts sa curriculum..
Ginpahanumdom sang komisyon ang publiko nga indi magpanic ukon mag-hoard, kag sa baylo magpadayon sa pag-inom sang tubig, pag-atipan sang mga tanom nga nagapanubo sang init, kag pagbinuligay halin sa national level pakadto sa barangay level.
