Dakop ang apat ka mga tripulante matapos nagpatigayon sang iligal nga pagpangisda sa kalalawran nga sakop sang banwa sang Panay, Capiz.
Ang mga nadakpan amo sanday alyas Ramil, 52 anyos; alyas Allen, 31 anyos; alyas Bryan, 35 anyos; kag alyas JR, 35 anyos tanan residente sang Estancia, Iloilo.
Sa interview sang Bombo Radyo Roxas kay Police Captain Eric Deocampo, officer-in-charge sang Panay Municipal Police Station, iya ginpahayag nga nadakpan sa akto ang mga tripulante samtang nagapatigayon sang pagpangisda gamit ang ginatawag nga “trawl” nga wala sang nagakaigo nga permit ukon dokumento para legal nga makapangisda sa amo nga katubigan.
Nakumpiskar sa mga nadakpan ang mga masunod:
Isa ka unit sang pump boat – ₱200,000
engine sang pump boat – ₱60,000
Fishing net nga kompleto sang accessories – ₱20,000
25 kilos nga assorted nga isda – ₱4,000
Kun sa diin may kabug-usan nga balor sang nakumpiskar: ₱284,000.
Sa subong, yara na sa paghinakop sang Municipal Environment and Natural Resources Office ukon MENRO-LGU Panay ang apat ka mga tripulante, lakip ang nakumpiskar nga kagamitan kag mga isda, para sa nagakaigo nga dokumentasyon kag disposisyon.
