Nagpaandam ang Roxas City Health Office sa publiko sa posible nga epekto sang ginapaabot nga Super El Niño, bangod sa sobra nga kainit kag kakulangan sang tubig nga mahimo magresulta sa nagkalain-lain nga problema sa ikaayong lawas.
Sa interview sang Bombo Radyo kay Dr. Lori Cahilog, Roxas City Health Officer, iya ginpahayag nga ang El Niño indi problema sa kakulangan sang tubig, kundi mahimo man ini magdala sang nagkalain-lain nga balatian.
Lakip sa mga balatian nga dapat bantayan amo ang heat exhaustion, heat stroke, dehydration, pagtaas sang blood pressure, kag iban pa nga cardiovascular diseases bangod sa sobra nga init.
Pahayag pa ni Cahilog, posible man magdamo ang water-related kag respiratory illnesses sa tion sang El Niño, lakip na ang diarrhea, dengue, kag iban pa nga balatian nga may kaangtanan sa respiratory system.
Suno sa iya, importante nga likawan sang publiko ang sobra nga pagtinir sa init kag indi magdugay sa gwa sang balay, ilabi na sa mga oras nga tuman kainit ang panahon. Kinahanglan man nga mag-inom sang bastante nga tubig agud malikawan ang dehydration.
Sa karon, ginapanawagan sang Roxas City Health Office ang publiko nga maghanda sa epekto sang Super El Niño, maghalong sa sobra nga kainit, kag magtipid sa paggamit sang tubig. Ginarekomendar man nga unahon ang tubig para sa importante nga kinahanglanon sang pamilya.
