Ginakabig na nga case closed sang Capiz Police Provincial Office ukon CPPO ang kaso sang pagluthang-patay kay Police Captain Rian Ampoyos matapos madakpan ang ikatatlo sa ginatudlo nga suspek sa krimen.
Suno kay Police Colonel David L. Cachumbo Jr., Provincial Director sang CPPO, iya ginpahayag nga nadakpan si Andy Evaristo Garcia 24-anyos, kag residente sang Sitio Stockfarm, Barangay Bungsuan, Dumarao, Capiz, paagi sa pagserbe sang warrant of arrest sa Sitio Tagulab, Barangay Poblacion Ilawod, Dumarao.
Suno kay Cachumbo, ang warrant of arrest nga ginserbe ang may kaangtanan sa kaso nga Murder with the Use of an Unlicensed Firearm, paglapas sa Article 248 in relation to Article 8 sang Revised Penal Code kag Section 29 sang Republic Act 10591.
Ang warrant ang gin-isyu ni Hon. Sesinio Navales Belen Jr., Presiding Judge sang Regional Trial Court 6th Judicial Region, Branch 15, Roxas City, sang Agosto 12, 2026, kag wala sang ginrekomendar nga piyansa para sa temporaryo nga kahilwayan sang akusado.
Matandaan nga natabo ang insidente sang Hulyo 20, 2026, pasado alas-dose sang kaagahon, sa isa ka KTV bar, kun sa diin ginluthang si Police Captain Ampoyos kag naigo sa wala nga bahin sang dughan matapos magluntad ang komosyon sa tunga sang pila ka mga customer.
Gindala pa ini sa ospital ang opisyal apang gindeklarar ini nga dead on arrival.
Sa subong, yara na sa kustodiya sang Dumarao Municipal Police Station si Garcia para sa nagakaigo nga disposisyon kag pag-turnover sa korte.
