Nagpanawagan ang Chairman sang Federation Roxas City Fire and Rescue Volunteers Inc. sa publiko nga magdonate sang dugo sa “Dugong Bombo 2026: A Little Pain, A Life to Gain” nga bloodletting activity nga pagahiwaton sa SM Roxas City sa November 14, 2026.
Ang amo nga bloodletting activity pagahiwaton simultaneously sa bilog nga Pilipinas, kaupod ang 32 ka stations sang Bombo Radyo Philippines, sa pakig-angut sa Bombo Radyo Philippines Foundation Inc.
Sa interview sang Bombo Radyo kay Mr. David S. McBride, iya ginpahayag nga importante ang pagdonate sang dugo bangod daku ini nga bulig sa mga tawo nga nagakinahanglan sang dugo kag mahimo makasalbar sang kabuhi.
Suno sa iya, limitado ang supply sang dugo para sa mga pasyente nga nagakinahanglan sini, gani ginpanawagan niya ang publiko nga magbulig paagi sa pagdonate sang dugo.
Pahayag pa niya, para sa mga kwalipikado kag kaya magdonate, indi ini dapat kahadlukan bangod gamay lamang ang kasakit nga mabatyagan, samtang daku naman ang mahimo nga bulig sini sa isa ka tawo nga nagakinahanglan.
Sa karon, ginapanawagan sang Federation Roxas City Fire and Rescue Volunteers Inc. nga ang ila mga volunteers kag ang publiko nga mag-upod sa bloodletting activity kag magdonate sang dugo agud makabulig kag makasalbar sang kabuhi.
