Ginpasalig sang legal team ni Vice President Sara Duterte nga may yara sila sang ila kaugalingon nga bahin kag account nga ipresentar angut sa mga alegasyon sang unexplained wealth sa tion nga mag-abot ang ila oportunidad nga makapresentar sang ebidensya sa impeachment trial.
Suno kay defense spokesperson Atty. Michael Poa, dapat tandaan sang publiko nga ang mga bagay nga gina-istoryahan subong kag ginabuyagyag sa mga hearing ang nabase lamang sa bahin sang prosecution.
Nagpamalibad si Poa nga magdetalye sa mga isyu nahanungod sa credit, transaksyon sa credit card, kag ginaalegar transaksyon sa luwas sang pungsod, nga nagasambit sang sub judice rule, nga nagadumili sa public discussion sang merits sang kaso.
Gin-athag man sini nga indi mangin patas bisan para sa prosekusyon kun ipaguwa sang depensa ang mga argumento kag detalye sang ila bahin bisan antes pa ini opisyal nga gin-file sa impeachment court.
Apisar nga gin-ako ni Poa nga dehado ang kampo sang Bise Presidente samtang nagahulat sang iya turno sa pagpresentar sang ebidensya, ilabi na sa isa ka highly political process, nagapabilin sila nga kumpyansa nga mapamatukan ang mga alegasyon batuk sa iya.
