Naglab-ot na sa Apat ka mga Overseas Filipino Workers (OFWs) ang pilason sa pag-atake sa Riyadh International Airport sang Saudi Arabia, kon sa diin tatlo diri ang nagapabilin sa intensive care unit ukon ICU.
Suno kay Department of Migrant Workers (DMW) Secretary Hans Leo Cacdac, wala pa sang narekord nga Pinoy nga napatay sa nasambit nga insidente.
Padayon ang monitoring sang DMW kag Overseas Workers Welfare Administration (OWWA) sa kahimtangan sang mga pilason nga mga Pinoy kag nagapakig-angot sa ila mga pamilya.
Suno sa report, indi magnubo sa 12 ang napatay kag masobra 300 ang pilason sa pag-atake sa airport.
Padayon nga nagalibot ang mga personnel sang DMW agud hibaluon kun may iban pa nga mga Pinoy nga napilasan sa insidente.
Nagpanugyan naman ang ahensya sa mga OFWs sa Saudi Arabia nga likawan ang mga lugar nga posible mangin target sang pag-atake kag pamatian ang mga anunsyo gikan sa embahada, konsulado, kag Migrant Workers Office sa Saudi Arabia, subong man ang mga social media pages sang ila gobyerno para sa mga updates.
Gin-abisuhan man ang publiko nga likawan ang pagkuha sang mga video ukon litrato sa nasambit nga pagpang-atake kag i-post sa social media, bangud nagalapas ini sa kasuguan sang Saudi Arabia.
