Nagapati ang pila ka mga estudyante nga indi dapat pag i-generalize sa mga menor-de-edad nga wala pa naga-18 anyos sa paggamit sang social media accounts banud ini ini ang pinakamaayo nga solusyon sa cyberbullying kag iban pa nga problema nga ginaatubang sang mga kabataan.
Sa interview sang Bombo Radyo Roxas kay Mr. Emil Jay Pilarca, iya ginpahayag nga importante ang social media sa komunikasyon kag pag-eskwela sang mga estudyante, ilabi na sa online kag blended learning kon indi posible ang face-to-face classes.
Suno sa iya, mahimo maapektuhan ang academic performance sang mga estudyante kag malimitahan ang ila kahilwayan sa pagpahayag sang ila kaugalingon kon pagadilian sila sa paggamit sini.
Pahayag pa niya, indi lamang ang paggamit sang social media ang dapat tutukan sa pagsulbar sang cyberbullying, bangud madamo ang posible nga kabangdanan sini kag indi lamang limitado sa m ga menor-de-edad. Ginpahayag niya nga kinahanglan usisaon ang kahimtangan sang mga kabataan sa ila panimalay, ang pagtratar sa ila sang ila mga kaupdanan, kag ang mga kabudlayan nga ila ginaatubang.
Suno kay Pilarca, mahimo lamang mangin band-aid solution ang pagdili sang social media kon indi matutukan ang pinaka-ugat sang problema. Gani, ginpanugyan niya nga dapat unahon ang paghangop sa sitwasyon kag eksperyensya sang mga kabataan agud makapangita sang mas malawig kag epektibo nga solusyon sa cyberbullying kag iban pa nga problema nga ila ginaatubang.
