CAPIZ-Malapit na matapos ang pagpaka-o kag pagpalapad sang multi-purpose covered gym sa Barangay Palaguian, Maayon, nga ginapondohan paagi sa 20% Development Fund sang Gobyerno Probinsyal sang Capiz sa idalom sang administrasyon ni Governor Fredenil H. Castro.
Pagagamiton ang pasilidad sa mga aktibidad sang komunidad, lakip ang mga pagtililipon, livelihood program, medical mission, kag sports activities. Mahimo man ini nga evacuation center sa tion sang kalamidad kag emerhensya, nga magahatag sang dugang nga espasyo kag mas maayo nga pasilidad para sa mga residente sang barangay.
Paagi sa sini nga proyekto, ginapaabot nga mangin mas hapos para sa mga pumuluyo ang pagpatigayon sang mga programa kag aktibidad sa ila komunidad, samtang nagahatag man ini sang mas masaligan nga pasilidad nga magamit sa tion sang emerhensya. Kabahin ini sang pagpanikasog sang Gobyerno Probinsyal sang Capiz nga magpatuman sang mga proyekto sa impraskratura nga nagasabat sa kinahanglanon sang komunidad.
