Ginapanawagan ni Ombudsman Jesus Crispin “Boying” Remulla sa Korte Suprema nga usisaon liwat ang doktrina nga may kaangtanan sa kaso sang plunder ukon pagpangawat sang daku nga kantidad sang kwarta sang gobyerno.
Suno kay Remulla, nagakaigo nga balikan kag usisaon sang Korte Suprema ang layi batok sa mga tawo nga nagapangawat sang billion-billion nga kwarta.
Para sa iya, indi dapat magamit ang layu bilang panagang agud malikawan ang pagsabat sa mga alegasyon sang pagpangawat sang kwarta sang gobyerno.
Ginkumparar man niya ini sa kontrobersyal nga mga proyekto sa flood control sa pungsod, kun sa diin ginapahayag nga madamo ang nagahikot sa likod sang mga transaksyon, lakip ang mga kontraktor kag pagbalhin-balhin sang kwarta, nga wala nagaguwa ang mga ngalan sang mga tawo nga nagabenepisyo sini.
Sa karon, 39 na ka kaso ang ginpasaka sang Ombudsman sa korte batok sa mga nagapungko nga senador, anay mga senador, mga kongresista, anay Speaker sang House of Representatives, mga kalihim sang gobyerno, mga kontraktor kag iban pa.
