Ginkabig nga tuman ka nubo ang proposed nga P40 tubtob P60 nga wage increase para sa mga minimum wage earners sa Western Visayas agud mapataas ang purchasing power sang mga mamumugon.
Sa interview sang Bombo Radyo kay Mr. Wennie Sancho, Secretary sang General Alliance of Workers Association, iya ginpahayag nga indi pa ini bastante agud masarangan sang mga mamumugon ang nagataas nga presyo sang mga balaklon kag nagadugang nga galastuhon.
Suno kay Sancho, may tatlo pa ka wage hearings nga ipatigayon antes makadesisyon ang Regional Tripartite Wages and Productivity Board (RTWPB) sa proposed nga wage increase.
Bangud sini, indi pa sigurado kun san-o kag kun pila ang aktuwal nga dugang sa sweldo nga mabaton sang mga minimum wage earners sa rehiyon.
Ginalantaw nga posible nga maaprubahan ang bag-o nga wage order antes matapos ang tuig 2026.
