Naglab-ot na sa lima ang na-record nga napatay bangud sa dengue sa probinsya sang Capiz.
Sa interview sang Bombo Radyo kay Joeffrey Espiritu, Public Information Officer sang Department of Health (DOH)-Capiz, iya ginpahayag nga base sa pinakaulihi nga datos, naglab-ot sa 1,051 ang na-record nga kaso sang dengue sa probinsya sa bulan sang Oktubre nga manubo ini sang 14 percent kon ikomparar sa kapareho nga tion sang nagligad nga tuig.
Suno kay Espiritu, kinahanglan nga magpakonsulta gilayon sa doktor kon may mabatyagan nga mga sintomas sang dengue agud malikawan ang paglala sang balatian.
Ang mga sintomas sini amo ang mataas nga hilanat, pagpanakit sang ulo, pagsuka kag iban pa.
Ginapanawagan man sang DOH ang publiko nga padayon nga tinluan ang palibot, kuhaon ang mga nagatipon nga tubig kag likawan ang mga lugar nga mahimo pamugaran sang mga lamok nga nagadala sang dengue.
