Ginaklaro sang Tapaz Municipal Police Station ang kamatuoran sang video nga nagalapta sa social media may kaangtanan sa ginapahayag nga nilukpanay sa banwa sang Tapaz, Capiz.
Ini matapos nga naglapta ang amo nga video sa social media kag posible nga nangin kabangdanan sang pagkabalaka sang mga pumuluyo parte sa seguridad sa ila lugar.
Sa interview sang Bombo Radyo kay PMAJ Gregg Anthony V Salbang, Hepe sang Tapaz Municipal Police Station, gin-athag sini ang aktuwal nga sitwasyon sa banwa kag ang tikang nga ginahimo sang kapulisan agud mapamatud-an ang kamatuoran sang impormasyon nga makita sa video.
Gina paathag gid niya nga wala gid ini kamatuoran ang mga naga gwa sa social media hinungod sa fake news nga video sang nilukpanay kag gina chekyar na nila kung sin-o gid ang main source sini nga video ukon diin halin ang video para maistorya kag maklaro ang kamatuoran.
Suno man kay Salbang, importante nga mapamatud-an anay ang kamatuoran sang mga post sa social media antes ini ipasa ukon ipaambit sa iban, agud malikawan ang paglapta sang sayop nga impormasyon nga mahimo magtuga sang kahadlok sa publiko.
Dugang pa, ginapanugyanan ang mga pumuluyo nga magkuha sang impormasyon halin sa opisyal nga mga source, ilabi na sa kapulisan kag lokal nga panguluhan, antes magpati ukon magpalapta sang mga viral nga video.
Padayon man nga ginapahanumdom ang publiko nga magreport sa mga otoridad kon may makita nga impormasyon nga nagapahayag sang posible nga krimen ukon problema sa seguridad sa ila komunidad.
