DULANGAN, Pilar, Capiz – Nasapwan nga wala na sang kabuhi ang isa ka menor de edad nga ginakabig nga isa man ka may Person with Disability “PWD” sa Sitio Lahab Barangay Dulangan Pilar, Capiz.
Ang biktima amo si alyas Eboy, 7-anyos, may psychosocial disability, kag residente sang nasambit nga lugar.
Sa interview sang Bombo Radyo kay Police Major Achilles P Fangco Jr., Officer-in Charge sang Pilar Municipal Police Station, iya ginpahayag nga nakabaton ang ila estasyon sang impormasyon nahanungod sa pagkakita sang isa ka bata sa sapa.
Suno sa iya, gilayon nga nagresponde ang kapulisan sa lugar kag sa inisyal nga imbestigasyon, nasapwan ang biktima nga nagahapa kag wala na nagaresponde sa higad sang sapa, nga ginapatihan nga nalumos.
Pahayag pa niya, ini ang bata nga gindeklarar nga nadula sang kaaganhon sang October 19 kun sa diin mahamuok ang tulog sang iya ginikanan naglakat ini nga wala sila kahibalo, apang sa masubo nga balita nasapwan na lang ini kag gindeklarar nga dead on arrival sang attending physician.
Sa karon nahibaluan nga yara na angbata nga ginbawian sang kabuhi sa punirarya samtang ginapatigayon ang imbestigasyon sang kapulisan agud mahibaluan ang dugang nga mga sirkumstansya sa likod sang insidente nga natabo.
