Nagpatigayon sang Oplan Galugad ang mga katapo sang Capiz Rehabilitation Center (CRC) sa mga selda sang Persons Deprived of Liberty (PDLs), agud masiguro nga wala sang mga ginadumilian nga butang sa sulod sang pasilidad.
Sa interview sang Bombo Radyo kay Jail Warden Arjuna Yngcong, iya ginpahayag nga narekober sa ginpatigayon nga paghalughug ang mga matalum nga butang, lighter kag foil nga posible gamiton may kaangtanan sa iligal nga droga.
Nahibaluan nga may kabug-usan nga 381 ka Persons Deprived of Liberty (PDLs) sa CRC, kun sa diin 14 ang kababainhan kag 367 ang kalalakinhan nga ginbahin sa apat ka selda.
Suno kay Yngcong, regular ang ila pagpatigayon sang galugad agud masiguro nga wala sang mga ginatago nga ginadumilian nga butang ang mga PDLs sa ila tagsa ka selda kag agud mapunggan ang posible nga paglapas sa mga pagsulundan sang pasilidad.
Dugang pa sang natungdan, naganubo ang kadamuon sang mga narekober nga ginadumilian nga butang kon ipaanggid sa nagligad nga tuig, nga para sa iya nagapakita sang positibo nga resulta sang ila regular nga pagpatuman sang Oplan Galugad.
