-- ADVERTISEMENT --

CAPIZ-Nanindugan si Sigma, Capiz Mayor Dante Rizal A. Eslabon nga may grave abuse of authority nga ginhimo si Vice Mayor Stephen F. Alayon, nga amo ang isa sa mga rason sang pag-isyu sang Office of the Ombudsman sang order nga nagapatuman sang anum ka bulan nga preventive suspension batok sa opisyal.

Sa interview sang Bombo Radyo Roxas kay Mayor Eslabon, ginpahayag sini nga may yara sang political motive sa pagpa-delay ni Alayon sa pagproseso sang proposed usufruct agreement nga may kaangtanan sa solar water system project sang banwa.

Suno kay Eslabon, wala ginsapak ni Alayon ang iya request nga ipaidalom sa deliberasyon sang Sangguniang Bayan ang nasambit nga kasugtanan sa isa ka non-government organization, bisan pa sang madamo na nga follow-up sa sulod sang siyam ka bulan.

Ang usufruct agreement amo ang kasugtanan nga nagahatag sang kinamatarong sa isa ka partido nga maggamit sang propiedad nga ginapanag-iyahan sang iban, suno sa mga kondisyon nga ginlatag sa kasugtanan.

Samtang, suno sa mga report, nakita sang Ombudsman nga may bastante nga basihan agud imbestigaran si Alayon bangud sa posible nga grave abuse of authority kag oppression.

-- ADVERTISEMENT --

Bangud sa suspension, gin-appoint naman si Sangguniang Bayan Member Norman “Nene” Marcelino bilang acting vice mayor sang Sigma.

Madumduman nga sang nagligad nga bulan, ginpatawag man sang Capiz Sangguniang Panlalawigan si Alayon agud magpaathag sa alegasyon sang grave abuse of discretion may kaangtanan sa iya pagdumili nga tugutan ang duha ka miyembro sang municipal council nga magtambong sa isa ka seminar sa Boracay.

Sa pihak sini, ginapaathag nga ang preventive suspension isa lamang ka administratibo nga tikang samtang ginahimo ang imbestigasyon kag indi pa ini nagakahulugan nga may pinal na nga desisyon sa kaso ukon napamatud-an na ang mga alegasyon batok kay Alayon.