CAPIZ-Epektibo gilayon ang pag-asumer ni Sangguniang Bayan (SB) Member Norman “Nene” Marcelino bilang temporaryo nga bise alkalde sang banwa sang Sigma, Capiz, kasunod sang pagserbe sang preventive suspension order nga gin-isyu sang Office of the Ombudsman–Visayas batok kay Vice Mayor Stephen F. Alayon.
Sa interview sang Bombo Radyo, gin-athag nga opisyal na nga nabaton sang mga nagakaigo nga opisina sang lokal nga panggobyernohan ang kopya sang nasambit nga suspension order, lakip ang Sangguniang Bayan, Human Resource (HR) Office, Office of the Mayor, kag Municipal Local Government Operations Officer (MLGOO) sang Department of the Interior and Local Government (DILG).
Ginapahayag nga ginpirmahan na man ni Sigma Mayor Dante Rizal A. Eslabon ang mga kinahanglanon nga dokumento kag ginpadala sa opisina ni DILG Secretary Jonvic Remulla agud pormal nga mapahibalo ang ahensya sa pag-asumer ni Marcelino bilang acting vice mayor.
Sandig sa duha ka pahina nga dokumento, nag-ugat ang preventive suspension sa reklamo nga ginpasaka mismo ni Mayor Eslabon batok kay Vice Mayor Alayon sa Office of the Ombudsman–Visayas.
Bangud sini, temporaryo nga ginpunggan si Alayon sa pagtuman sang iya mga katungdanan samtang nagapadayon ang proseso may kaangtanan sa reklamo, suno sa nasambit nga suspension order.










