ROXAS CITY – Gindepensahan sang abogado sang isa sa duha ka babaye nga ginatudlo nagapadalagan sa 25 Days Double your Money Scheme ang iya kliyente batuk sa mga akusasyon sang pila ka mga investors nga wala nabalik ang ila investment.
Sa exclusive interview sang Bombo Radyo kay Atty. Leo Superio, ginpahayag sini nga indi dapat pagbasulon ang iya kliyente nga si Madam Kat bangud kasubong sa iban nga mga investors, biktima man ini sang investment scam ni Madam Junelyn.
Ginatudlo sini nga utok kag ang yara sa likod sang operasyon sang nasambit nga investment scheme amo si Madam Junelyn kag si Madam Kat ang makabig nga investor kag upline lamang sa diin matapos matipon ang mga kuwarta sang investors, gilayon niya ini ginahatag kay Madam Junlene.
Ba-se man sa pahayag ni Madam Kat kag sa pagpangusisa ni Atty. Superio wala sang ginahatag nga acknowledgement receipt si Madam Junelyn sa mga uplines nga nagahatag sa iya sang matipon nga investments gikan sa mga nagsalig nga investors.
Apang may pamatood si Madam Kat nga yara kay Madam Junelyn ang tanan nga kuwarta sang mga investors ba-se sa ginauyatan nga video kag recordings.
Ginsabat man ni Atty. Superio ang akusasyon sang pila ka mga investors nga gikan sa investments sang mga investors ang naangkon nga house and lot kag salakyan ni Madam Kat.
Suno sa abogado nga gin-loan sang iya kliyente sa banko ang gingamit sa pagbakal sang nasambit nga propedad kag tobtob sa karon padayon pa niya ini nga ginabayaran.
Nagpasiguro man ini nga pasakaan nila sang panumbungon si Madam Junelyn apang ginahulat lamang nila ang pagtuman sini sa iya ginpromesa sa mga investors nga wala nabalikan sang ila investment.
Samtang ginkumpirma ni Atty. Superio nga na-estorya na nila kaupod ang iban nga mga investors si Madam Junelyn sa diin nagpromesa ini nga sa masunod nga bulan sang Pebrero kag Marso sini ibalik ang kapital sang mga investors.
