ROXAS CITY, CAPIZ – Ginpatpat sang isa ka abogado ang daku nga papel sang Katarungang Pambarangay Law sa sistema sang hustisya sa Pilipinas.
Sa interview sang Bombo Radyo kay Atty. Roman Almalbis, Bombo Abogado kag Vice President sang Integrated Bar of the Philippines (IBP) – Capiz Chapter, iya ginpahayag nga ang nasambit nga layi isa ka bahin sang Local Government Code of the Philippines (Republic Act No. 7160).
Suno kay Atty. Almalbis, tinutuyo sang sini nga layi nga masolbar ang mga problema sa tunga sang mga pumuluyo sa lebel sang barangay pa lang, paagi sa paghusayay ukon pagkasugot antes pa ini mag-abot sa korte.
Dugang pa sang natungdan nga ang Katarungang Pambarangay Law isa sa mga mekanismo sang Alternative Dispute Resolution (ADR) sa pungsod, nga nagahatag sang alternatibo sa formal nga proseso sa korte.
May tatlo ka nagapanguna nga pamaagi sa idalom sang nasambit nga layi: ini amo ang mediation, conciliation, kag arbitration.
Sa mediation, ang Punong Barangay amo ang naga-akto bilang tagpatunga sa mga may problema nga partido.
Kon indi magmadinalag-on ang mediation, masunod nga tikang ang conciliation, nga ginapatigayon sa atubang sang Lupon Tagapamayapa, upod ang pili nga miyembro sang barangay.
Samtang ang arbitration amo ang katapusan nga tikang, kun sa diin ang duha ka partido nagasaad nga boluntaryo nila nga ginahatagan sang otoridad ang neutral nga tagpatunga – ang Punong Barangay ukon Lupon Tagapamayapa – sa pagdesisyon sa ila kaso.
Ginhatagan pagtamod ni Atty. Almalbis nga paagi sa Katarungang Pambarangay, mas mapadasig kag nagapahapos sa mga pumuluyo ang pag-angkon sang hustisya, kag makabulig ini sa pagnubo sang kaso sa mga korte.
