ROXAS CITY, CAPIZ – Ginpatpat sang isa ka abogado ang importansiya sang Republic Act 9048 ukon An act further authorizing the city or municipal civil registrar or the consul general to correct clerical or typographical errors in the day and month in the date of birth or sex of a person appearing in the civil register without need of a judicial order.
Sa interview sang Bombo Radyo kay Atty. Dana Dee Rotoni Fantilanan-Alelis sang Integrated Bar of the Philippines-Capiz Chapter, iya ginpahayag nga ang Republic Act 9048, nagatuyo nga pasimplehon ang proseso sang pag-correct sang mga sala sa civil registry documents pareho sang birth certificate, marriage certificate kag death certificate.
Suno kay Atty. Alelis, ang RA 9048 nagahatag kahigayunan sa mga indibidwal nga may mga sala sa ila mga dokumento nga mapasulhay ang proseso sang pagkaayo sang mga ini nga wala na nagakinahanglan sang korte ukon judicial order.
Dugang pa sang natungdan, paagi sa RA 9048, ginaprotektahan man ang integridad kag eksakto nga impormasyon sang mga personal nga dokumento, nga may daku nga papel sa legal kag personal nga mga transaksyon.
Ginpanugyanan man ni Atty. Alelis ang publiko nga kun may mga clerical ukon typographical errors sa ila civil registry documents, dapat magpadulong sa local civil registrar agud maproseso ang pagkaayo sa idalum sang RA 9048.
