ROXAS CITY – Wala sang kinamatarong ang Bureau of the Internal Revenue (BIR) nga sukton sang estate tax si Ferdinand ‘Bongbong’ Marcos Jr., bangud indi ini ang estate sang nagtaliwan nga anay presidente nga si Ferdinand Marcos Sr.
Ini ang pahayag ni Atty. Nelson Borja, isa ka Capiznon criminal lawyer kag nakahawid naman suno diri sang tax cases, sang mainterview sang Bombo Radyo.
Para kay Borja, ang dapat nga sukton sang gobyerno amu ang estate ni Marcos Sr., kag indi si BBM, bangud indi ini ang nagahawid ukon ang administrador sang propedad sang iya nagtaliwan nga amay kag wala pa sang natabo nga partition.
Dugang pa sini nga kuntani si anay first lady Imelda Marcos ang dapat nga padal-an sang sulat sang BIR bangud ini ang co-owner kag ang asawa sang nagtaliwan nga anay presidente.
Ang estate tax suno diri amu ang buwis sa propedad nga ginbilin sang nagtaliwan nga persona.
Pahayag pa ni Borja nga may kinamatarong ang pamilya Marcos nga magkuwestiyon sa tuman ka dako nga kantidad nga ginasukot sang gobyerno, bangud ang iban nga propedad ang sequester na sang gobyerno kag na-auction na.
Ginsegundahan man sini ang nangin pahayag ni sen. Imee Marcos nga pulitika ang rason sa pagguwa sini nga isyu agud gub-on ang kandidatura ni BBM.
Handum ni Borja nga kun mangin presidente si Marcos Jr., masundan sini ang maayo nga binuhatan sang nagtaliwan nga anay presidente Marcos.
Matandaan nga may kaangtanan ini sa isyu sang estate tax nga nagdangat sa P203 billion nga ginaalegar wala mabayaran sang pamilya Marcos.
