Plano nga pasakaan sang mga awtoridad sang kaso nga kriminal si Atty. Elmer Galicia, ang abogado nga nag-notaryo sa counter-affidavit ni anay Bamban Mayor Alice Guo kun ini mapamatud-an nga nagabutig ini suno kay Presidential Anti-Organized Crime Commission (PAOCC) spokesperson Winston Casio.
Suno diri, gina-imbestigaran na sang mga ini kun matuod ang ginasiling ni Galicia nga nagpakig-angut sang personal sa iya si Guo agud magpanotaryo sang Agosto 14 sa San Jose Del Monte City, Bulacan.
Suno sa PAOCC official, ginahulat na lamang sang mga ini ang mga dugang nga verified information halin sa iban nga ahensiya para sa posible nga pag-file sang kaso batuk kay Atty. Galicia. Sa oras suno diri nga magka-bastante nga basehan dira na sila maga-file sang criminal charges.
Samtang, ginbuyagyag man sang PAOCC official nga nakatalana nga pasakaan sang dugang pa nga mga kaso ang na-dismiss nga alkalde sang Bamban nga si Alice Leal Guo sa mga masunod nga semana kun sa diin kabahin suno diri sa gin-file nga mga kaso amo ang tax evasion, qualified trafficking in person kag ginpamatbatan nga guilty sang Office of the Ombudsman para sa grave misconduct bangud sa pag-facilitate sini sa operasyon sang illegal POGO hub sa iya nga banwa.
