Ginpamatukan sang Office of Public Counsel for Victims (OPCV) sang International Criminal Court (ICC) ang pangabay ni anay Presidente Rodrigo Duterte para sa temporaryo nga kahilwayan samtang ginahearing pa ang kaso nga crimes against humanity batuk sa iya.
Ginpanindugan sang Office of Public Counsel for Victims (OPCV) nga may basehan sa gihapon ang mga alegasyon batok kay Duterte, kag bangud sa kabug-aton sang kaso, mas dako ang posibilidad nga makapalagyo ini. Nagsiling sila nga may mas daku siya nga insentibo nga malikawan ang salabton.
Ginhatagan man pagtamod sang Office of Public Counsel for Victims (OPCV) nga ang kamatuoran nga wala pa siya nagtinguha nga impluwensyahan ang mga testigo indi garantiya nga indi niya ini paghimuon, ilabi na nga nahibaluan na niya ang mga identity kag testimonya sang pila sa ila.
Gindugang pa nila nga ang pagbuy-an kay Duterte posible makapamahog sa mga biktima kag makatuga sang kinagamo sa pungsod.
Suno sa talatapan, para sa mga biktima, ini lamang ang pamaagi agud masiguro nga magapangatubang ini sa iya nga hearing.
Ang ICC Prosecutor nagpamatok anay sa amo man nga pangabay. Samtang, ginpahayag naman sang Philippine DOJ nga handa sila nga magbulig nga proteksyon ang mga testigo.
Madumduman nga gin-aresto si Duterte sang Marso 11, base sa ICC warrant may kaangtanan sa ginaalegar pagpamuno sini sa mga death squads sa idalum sang kampanya kontra droga.
