ROXAS CITY – Kumpirmado nga nalakipan sang ammonium nitrate ang abono nga nakumpiskar sa duha ka mga persona nga nadakpan nga nagapangisda sa kadagatan nga sakop sang Banica, Roxas City.
Ginkilala ang mga nagkaladakpan nga sanday alyas “Edgar”, 46 anyos kag alyas “Robert”, 42 anyos, lunsay residente sang Brgy. Banica sining syudad.
Sa interview sang Bombo Radyo kay PCPT. SEMDAN V. SITCHON, Chief sang Capiz Maritime Police Station, matapos nga ma-examine ang amu nga abono, kumpirmado nga ginakalakipan ini sang ammonium nitrate nga ginapahayag ginagamit sa dynamite fishing.
Dugang pa sini, peligroso ang amu nga subtance bangud sa makadala ini sang halit indi lamang sa kadagatan kundi pati na sa tawo nga nagagamit sini.
Mahibaluan nga magluwas sa abono, nakumpiskar man sa posisyon sang mga nagkaladakpan ang baroto, fishing gear, ginapahayag nga explosives ukon dinamita kag mga isda.
Sa karon, yara na sa kustodiya sang Capiz Maritime Police Station ang mga narekober nga kagamitan samtang napasakaan naman sang nagakaigo nga panumbungon ang mga nagkaladakpan.
