ROXAS CITY – Ginsaysay sang isa ka Criminal lawyer ang mga nagkahinabo sa ginhiwat nga 1986 EDSA People Power Revolution kag nangin eksperyensiya sa administrasyon sang diktador kag anay presidente nga si Ferdinand Marcos, Sr.
Sa interview sang Bombo Radyo kay Atty. Nelson Borja, isa ka Capiznon kag Criminal lawyer, suno diri, ang pagpatay kay anay senador Benigno Simeon ‘Ninoy’ Aquino Jr., ang makabig ugat sang tanan, tubtob nga nagluntad ang nasambit nga People Power.
Pahayag sini nga sang ginluthang-patay si Ninoy Aquino, didto kag nagsugod nga nagpatigayon sang snap election kun sa diin ang gindeklarar sang Comelec nga presidente amu si Ferdinand Marcos Sr., kag si Arturo Tolentino bilang bise-presidente.
Apang, Pebrero 7, 1986 sang ginpahayag nga may nagluntad nga pagdinayaay, kag Pebrero 22, sa kapareho nga tuig sang nagwithdraw sang iya suporta kay Marcos ang iya Defense secretary nga si Juan Ponce Enrile kag ginsuportahan naman ini ni Fidel Ramos nga nagapungko bilang Chief of the Philippine Constabulary kag Vice Chief-of-Staff sang Armed Forces of the Philippines.
Bangud sini nga pagwithdraw kag pag-apin ni Ramos kay Enrile, ginpahayag ni Atty. Borja nga luyag sadto ni Gen. Fabian Crisologo Ver, ang Commanding Officer sang Armed Forces of the Philippines (AFP) nga bombahon ang Campo Crame kun sa diin nagatenir sanday Enrile kag Ramos, apang ginmanduan suno diri ni Marcos ang mga militar nga indi magpangbomba, sa baylo i-dispersed ang mga tawo bangud madamo sang mga sibilyan nga madalahig.
Tubtob nga sang Pebrero 26, suno ka Borja nga nagbiya na sa Malacañang ang pamilya Marcos kag nagpadulong sa America.
Posible suno diri nga nagpamati ang anay diktador sa abiso sang suod nga abyan sini nga anay presidente sang Estados Unidos nga si Ronald Reagan, nga magbiya na sa Pilipinas.
Sumugod nga nagbiya si Marcos sa Pilipinas, didto kag nagsugod ang revolutionary form of government sa idalom ni anay presidente Corazon Aquino.
Para kay Borja may pagkabalaka sadto anay si Marcos sa nagluntad nga People Power Revolution rason nga wala ini nangin madinuguon.
