ILOILO CITY – Nagpahayag sang pagkontra ang nagkalain-lain nga academic organizations kag humanities units sa ginaduso nga pagbag-o sang Commission on Higher Education “CHEd”, sa General Education “GE” curriculum.
Suno sa tagsa ka grupo nga posible ini maaghuyang ang critical thinking kag civic formation sang estudyante.
Lakip sa pahayag sang Philippine Political Science Association, Philippine Sociological Society, kag Division of Humanities sang University of the Philippines Visayas, tinutuyo nila ang ipabutyag nga indi dapat mangin teknikal ukon pang-empleyo lamang ang focus sang edukasyon.
Pahayag sang grupo, importante sa gihapon ang humanities kag social sciences agud mapasangkad ang ethical reasoning, independent thinking, kag paghangop sa kasaysayan kag demokrasya.
Dugang pa sa ginakabalaka sa plano nga pagpanubo sang GE units halin 36 pakadto sa 18 ukon 21 units, bangud posible ini makaapekto sa pagtuon kag trabaho sang mga manunudlo sa GE subjects.
Nagapanawagan man ang organisasyon sang mas madalom kag transparent nga konsultasyon antes aprubahan sang CHEd ang ginaduso nga curriculum overhaul.
